مينا سيندروم

السيد مينا سيندروم

هو شخصية طبيعية خالص زى أى شخص طبيعى نعرفوه أنا وأنت يأكل ويشرب ويتنفس وليه أربعة اطراف عادى خالص وبيمشى على أيديه مش على رجليه يعنى هو شخصية طبيعية جدا وعادية ، امال أيه اللى رشحه أنه يبقى معانا النهاردة فى باب شخصيات على البلوج ؟؟؟

الأجابة بسيطة جدا جدا أن السيد مينا عنده مجموعة أعراض Syndrome بتخلى أى شئ يتعلق بالتكنولوجيا يقرب منه يحصله حاجات عجيبة جدا جدا وميرضاش يشتغل وتلاقى الجهاز دة بيهيس وبيعمل حاجات غريبة بمجرد أن مينا قرب منه وأشتغل عليه

عندى أنا على سبيل المثال لما مينا بيشرف عندنا فى البيت لازم وحتما ولابد النت يفصل ، ويحلف النت برأس أجداده أنه ماهو جاى تانى أبدا الأ بمغادرة السيد مينا للمنزل أو لما ينام!!! ساعات بيبقى جاى تعبان فيقلل شوية على السرير فى أوضتى وساعتها تقريبا مفعوله بيقل وبيروح خالص والنت بيشتغل ، أول مايفوق من غيبوبته هوب النت يفصل تانى ، والموضوع دة بيحصل كل مرة بييجى هو فيها لدرجة أن باقى أصحابى عرفوا الموضوع دة وأعترفوا بيه كظاهرة حقيقة ، مرة واحد منهم بيتصل بيا وبيقوللى عندك نت ولا مينا موجود ؟؟؟؟ لأنه متأكد أن طالما مينا عندى يبقى النت فاصل !!

برضه من اعراض السيد مينا جهازه المسكين ، لما بيقعد على جهازه الجهاز بيقعد يهيسس ياعينى ويعمل حاجات غريبة مرة الهارد يتقرأ على أنه شوية وشوش بتضحك Smiling Emotions مع العلم أن الكلام دة هو اللى بيقراه البيوس Bios والجهاز ميرضاش يشتغل ، وتلاقى النت موجود ومش فاصل بس مش بيفتح أى مواقع نهائيا ولاحتى جوجل ولما تشغل أى برنامج زى Switch Sniffer مش بيقرأ الراوتر كأنه فاصل تماما وكان المفروض أن ده يبقى الطبيعى الأ أن النت مش بيفتح وعلى الرغم من ذلك بيبقى برنامج uTorrent شغال بيحمل عادى خالص وعلى 220 ك/ث كمان!!!

من الأعراض اللى بتحصل على جهاز مينا أنه مبيرضاش يعمل كوبى Copy بأى حال من الأحوال مع العلم أن جهازه مش ميت ولا بايظ بالعكس جهازه زى الفل بس هو السبب مش الجهاز ، الجهاز بيبدأ فى الكوبى عادى ويقولك الجهاز 3 Minutes Remaining أى أنه هيخلص كمان 3 دقايق والمفترض أن الرقم دة بيقل ، أنما جهاز مينا بيزيد عنده وبعدها ب 10 دقايق تلاقيه بيقولك 1236502 Minutes Remaining ويفضل يزيد لحد ما أنت تقفله وتزهق !!!

ينصح دائما بالتعامل مع أجهزتك بحرص شديد عند تواجد السيد مينا سيندروم حواليكم أو فى المنطقة ولو مرة سألك أيه أخبار النت عندك قله النت فاصل بقاله كام يوم والسويتش مش شغال والراوتر أتحرق وخط التليفون مش بيشتغل من أساسه أما عن الجهاز فهو أتحرق ومش بيبتدى أساسا والموبايل بتاعك مسقط شبكة وال MP3 بتاعك فاصل شحن والشاحن بتاعه باظ ومفيش منه ، وبكدة يبقى أنت أستبعدت كافة الأحتمالات اللى تخلى السيندروم يوصلك ولو عن طريق الكلام فقط

الشخصية دى ممكن أكتب عنها صفحات وصفحات أنما الوقت مبيسعفش أبدا ، وبعد أذنكم أنا رايح أرد على السيد مينا بيتصل أهه ويارب أفتكر أقله أن جهازى بايظ وربنا يستر

ملحوظة هامة جدا جدا : الشخصيات المقدمة على صفحات المدونة أنما هى شخصيات من محض خيال كاتبا لبلوج وأى تشابه بين الشخصيات اللى على البلوج والواقع لهو من محض الصدفة البحتة ، وكاتب البلوج لايتحمل مسؤلية أى ضرر ناتج عن هذا التشابة

أنا والبحر والهوا والزبالة

الحكاية انى كنت ماشى على البحر مع الزملاء الأعزاء والأصحاب الأوفياء والنزلاء السعداء ألخ ألخ ألخ ، وبالتحديد على شاطئ المندرة أمام محل شهير يقوم ببيع الجيلاتى ، وليه فرع تانى على البحر برضة بالقرب من القلعة وكفاية تلميحات على كدة ، أشترينا الجيلاتى وعدينا السكة وقعدنا ناكل الجيلاتى وبعد ملخصنا بدور على سلة عشان أرمى فيها العلبة بتاعت الجيلاتى الفاضية ، طبعا ملقيتش خالص ببص على الشاطئ والرمال الأقى مناظر رائعة جدا جدا ، أكوام وأكوام من العلب الفاضية والورق والأكياس والزبالة وكلها تبع السيد صاحب محل الجيلاتى وبصراحة مناظر وحشة جدا جدا جدا وتقرف وتبين أد أيه احنا شعب غير متحضر نهائى ، المهم أسيبكم مع الصور المقرفة

ملحوظة مهمة جدا : اللى عايز يشوف الصورة واضحة يدوس عليها عشان تكبر

أيه رأيكم فى المناظر الجميلة دى ؟؟؟ فيها أيه لما كلنا نرمى فى السلة ؟ وفيها أيه لما الحكومة توفر أماكن نرمى فيها ؟؟؟ ربنا يسهل ونوصل لحل للمشكلة دى

الشاب داونلود

الشاب داونلود

شخصية على دونلود أو محمد داونلود هتلاقيها كتيرة وهنقابلها كتير فى حياتنا وهو الشخص اللى بيؤمن أن الحياة بدون داونلود متستاهلش أن احنا نعيش فيها ولازم نتخذ قرار بشأنها أما الأنتحار أو الداونلود

الشخص دة غالبا بيتسم بأنه يا أما ذكى جدا وعنده حتة هطل كدة على خفيف يا أما غبى موت وتشوف منظره تموت من الضحك ، وهو أكيد عنده جهاز أمال بيدون أزاى وتلاقى عنده خط النت سريع مش أقل من ميجابت فى الثانية وتلاقى عنده برامج دانلود كتير تبدأ بالتورنتات زى برنامج uTorrent وتنتهى ببرامج التحميل السريع زى برنامج Mass Downloader كدة

وتلاقيه كمان حافظ أن موقع كذا نزل برنامج كذا وموقع كذا نزل فيلم كذا النهاردة ، أو تلاقيه عارف أن الموسم التالت من مسلسل كذا هينزل نسخة DVDRip فى يوم كذا مع العلم أن النسخة ال HDTV نزلت يوم كذا ، بمعنى ان مشغول طول النهار بالداونلود وهيعمل ايه بالتحميل وتسأله : أيه يابنى هتعمل أيه بكرة ؟؟؟ يقولك هحمل سيزون كذا من مسلسل كذا بالأضافة إلى فيلم كذا وكذا ، تقوله يابنى أقصد هتعمل أيه فى دنيتك هتهبب أيه ولا هتقعد فى البيت ، يبصلك بغباء بدون فهم ويقولك ماهو أنا قلتلك هحمل كذا وكذا الله هو أنت مبتسمعش ولا أيه ؟؟؟

مع العلم أن هو اللى مغيب ومايعرفش أى حاجة فى دنياه الأ الداونلود ، هتعمل أيه يابنى بكرة ؟ دانلود ، طيب هتعمل أيه بالليل ؟ داونلود ، طيب عملت أيه أمبارح ؟ داونلود ، هتفطر أيه بكرة ؟ دانلود ، مبرمج على أنه يدون أى حاجة فى أى وقت حتى لو مش هتنفعه بعد كدة المهم يدون وخلاص!!!!

البنى أدم دة بيبقى طيب غالبا ومعظم الأحوال غير مؤذى ومش شرانى خالص ، ولكن أتق شر الحليم أذا غضب ، وحالات الغضب بتاعته بيرجع بدايتها لعدة أسباب منها أن النت فاصل ومش عارف يحمل وهو متضايق لأن النت فاصل ، او أن الهارد مليان عنده ومش لاقى مكان يحمل فيه ، أو النكبة الكبيرة بقى لما يكون مش لاقى حاجة يحملها بتلاقيه متضايق لأن جهازه مش شغال بيحمل وهو غالبا بيبقى قلقان وعنده حيرة كبيرة لأنه مش عارف يحمل أيه وتلاقى برنامج حياته واقف ومتكعبل , لأنه بيبقى غالبا واخد على النوم على صوت جهازه اللى شغال طول الليل بيحمل

نصيحة هامة : لما تيجى تتعامل مع أى شخصية من دول أتعامل معاه بحرص وشوف الأول مزاجه التحميلى كويس ولا لأ لأنه لو كان مش كويس هيقرفك فى عيشتك خالص ومش هتعرف تتعامل معاه نهائيا

كنا مع شخصية السيد دانلود وكل شخصية وأنتم بخير

ملحوظة هامة جدا جدا : الشخصيات المقدمة على صفحات المدونة أنما هى شخصيات من محض خيال كاتب البلوج وأى تشابه بين الشخصيات اللى على البلوج والواقع لهو من محض الصدفة البحتة ، وكاتب البلوج لايتحمل مسؤلية أى ضرر ناتج عن هذا التشابة

طوابير فواتير المصرية للأنفصالات

الفواتير الفواتير فالتحظر يوم الفواتير

من يومين كدة أسعدنى الوالد بأطلالة رائعة وأشراقة هائلة وأطلعنى على ميعاد دفع الفواتير اللى هو كان تانى يوم وما أدراك بيوم دفع الفواتير اللى بيبدأ بطابور كام ساعة وبينتهى غالبا بشوية خناقات

رحت على مكتب الدفع اللى هو بالمناسبة مش تبع الهيئة المصرية للأنفصالات بل هو تبع البريد أى أن البريد والأنفصالات يقتسمان المبنى المهم مش دى القضية أنما الحكاية كلها فى كيفية دفع الفلوس

صحيت يومها الساعة 8 صباحا عشان أدفع الفواتير أل يعنى عشان مالقاش حد فى الطابور والأقى المكتب فاضى وأدفع وأخلص ، رحت راكن الكار جنب باب المكتب ودخلت وياريتنى مادخلت أخدت صدمة حلوة أوى على الصبح كدة أسمها طابورين زى الفل الحاجة اللى فكرتنى بموضوع خوازيق القدر

المهم الطابورين كانوا عامليين زى ماتش الكورة اللى مالييش فيها بالمناسبة وعلى يمين حضراتكم ملعب السيدات واللذى يتكون من 12 لاعبه وعلى اليسار أعزائى المستمعين والمشاهدين فريق الرجال واللذى يتكون من 14 لاعبا وبحسبة بسيطة سيداتى يكون أمامى 26 نفر عشان أوصل للشباك

ماعلينا أخدتنى الحماسة ورحت داخل بثقة على طابور الرجال وأول ماوقفت لقيت راجل قاعد على كرسى على الشمال بيقوللى على فكرة أنا واقف قدامك وطبعا كل اللى واقفيين أكدوا على كدة فغصب عنى وافقت وبكدة بقوا 27 نفر ، قلت ربنا يسهل الحال

ربع ساعة عدت ومافيش أى بنى أدم بيطلع من الطابور !!!! فيه أيه ؟؟؟!!! أبدا البرنتر عطلانه عشان ال Feeder مش بيسحب ورق !!! أوبا أيه الحظ النحس دة المهم عشر دقايق تانية والبرنتر أشتغلت الحمدلله وأبتدت الجحافل تطلع من الطابور وأول نفر أخد دقيقة فقط وقلت لو طلع شخص كل 1 دقيقة يبقى قدامى أن شاء الله حوالى نص ساعة على الأقل

أبتسمت وقلت كويس مش بطال نص ساعة وأتنفس نسيم الحرية ، مع العلم أن المكتب بياخد واحدة ست وبعدها واحد راجل ، بس وأنا واقف على سهوة الأقى شخص بيقول للشخص اللى قدامى بأربع أشخاص أن هو اللى كان وراه من نص ساعة وراح يجيب فطار ؟؟!!!!!!!!!!!!!! الله هالله بسم الله ماشاء الله أيه الحلاوة دى ساب الطابور وراح يجيب فطار ورجع عشان ياخد مكان قدامنا عادى خالص المهم أن الناس اللى واقفه ما أعترضتش كلها فأنا مقدرتش أتكلم وأستعوضت ربنا فى الدور الزيادة اللى أتزود علينا دة

الظاهرة بقى أن كل شوية ييجى راجل عجوز ومش قادر يصلب طوله أو واحدة مش قادرة تقف وتروح واقفه أو يروح واقف قدامنا والطابور عمال يزيد من قدام أكتر مابيزيد من ورا!!! واللهم لا أعتراض على مشيئتك بس السؤال هنا : لما أنت راجل عجوز ومش قادر تييجى تقف فى الطابور جيت ليه أساسا ؟؟ ماأديتش أى حد تانى الفلوس يدفعهالك ليه ؟؟؟؟ أوكاى عادى الطابور زاد كام قدامى يعنى سبعة أو تمانية مش مشكلة المسامح كريم

وأحنا واقفين فى أمانة الله الناس وقفت تانى والفواتير مبتطلعش ، أيه اللى حصل تانى ؟ البرنتر فرقعت ولا الموظف طار ولا أيه اللى حصل ؟؟؟ لأ الغلطة المرة دى من واحدة ست نسيت تجيب الفلوس فالرجال بعد ماطبع أسمها والنمرة طلعت معهاش الفلوس واحت تجيبهم !!! والموظف الله يكرمه قال مستنى الست قال وهو فى الحقيقة عايز يريح حبتين مع أنه مشتغلش أساسا !!! المهم بعد ما الناس أبتدت تشتكى راح مكنسل طابور السيدات عقبال ما الست تييجى بالفلوس ، ياما أنت كريم يارب كدة بقى قدامى 16 نفر فقط اللى هما الرجال بعد الناس النطيطة اللى بقت تقف قدامنا عشان كبار فى السن

ويافرحه ماتمت الست المصيبة جات من حيث لا أدرى ولا أعلم بالفلوس ووقفت تانى وبكدة عاد طابور السيدات للعمل مرة أخرى ةتبقى أمامنا نحو 26 واحد أى أننا عدنا لنقطة البداية مرة أخرى بعد حوادث النطيطة وأتفقت الجموع على عدم أدخال أى أحد أمامنا مرة أخرى حتى لو بيموت أو عنده شلل رعاش

وأنا واقف فيه على شمالنا كرسى طويل للناس الكبيرة ففيه منهم واحد قاعد أسمه سيد كل شوية يقول ” وحدوووووووووووووووووووووه ” والناس ترد عليه ، ويرجع يقول ” وحدووووووووووووووه ” والناس ترد عليه وفى النهاية أكتشفنا أن الراجل دة أساسا مش جاى يدفع ولا نيلة دة راجل مجنون كل يوم بيقف نفس الوقفة دى ويقعد يقول وحدوه!!!

أما بقى عن الرقيقة فهى دى الحاجة الوحيدة اللى هونت عليا الوقفة الخرا دى ، والرقيقة ماهى الأ بنت شابة زى العسل كانت واقفة على يمينى فى طابور منتخب السيدات ، كانت عايزة تسأل الراجل بتاع الشباك عن مكان دفع الفواتير القديمة وهل هو فى نفس المكتب ولا لأ ، والمشكلة أن كل السيدات مطنشينها وهى صوتها مش طالع فى الدوشة والقرف بتاع المكتب ، بس رفعت صوتى وسألت الرجال عن اللى هيا عايزاه والحمدلله طلع الدفع فى نفس المكتب وفضلنا واقفيين بنتكلم عن المكتب وقرفه وأحوال الدفع فى بلادنا العظيمة

وفى نص الحوار دخل الراجل اللى ورايا واللى هو من مؤيدى نظرية المؤامرة اللى علطول محتج وعلطول مهضوم حقه وقال : “ماهو أحنا اللى علطول ساكتين ، احنا اللى سامحينلهم بكدة ، فيها أيه لو ييجوا يحصلوا الفواتير فى البيت زى أى شئ تانى ؟؟؟ فيها أيه أحنا اللى ساكتين أحنا اللى سمحنالهم ، أحنا لو نعترض من الأول مكنش دة حصل ” وأنا عمال أقله حقك عليا معلش تتعوض المرة الجاية وهو مصمم على كلامه ، يادى النيلة يارب نخلص

بس الناس الكبيرة العواجيز لقطت طرف الحوار وأصبحت الفواتير مناقشة عامة وكله خلاص بقاله رأى فى المكتب وأصول المعاملة والمفروض ومش المفروض ، واللى يقولك كنا بندفع 18 جنية فى السنة أشتراك دلوقتى بقى 32 فى ثلاثة شهور والتانى اللى يرد عليا : أه والنبى يا حاج كلامك صح ويقعد يرغى فى حاجة هو مش فاهم نصها على الأقل دة أن كان فلهم أى شئ أساسا

كل دة وأنا واقف عمال أراقب الناس كلها اللى فى المكتب وكان يوم أسود مطلعتلهوش شمس يوم ماقررت أروح أجفع الفواتير واليوم دة عدى بعد ما وقفت حاولى ساعة ونص فى الطابور لمجرد أنى أدفع الفاتورة , وطبعا وأنا خارج أشتريت لى كيتوفين بتاع الصداع عشان اللك والقرف اللى شفناه جوا المكتب

أنا بس ليا شوية ملاحظات على أسلوب الدفع فى بلادنا :

أول هام : أذا كنت أنت طالب منى فلوس ليه ماتجييش تحصلها زى أى فاتورة بنى أدمين تانية سواء كانت كهرباء أو غاز ألخ ألخ

تانى هام : لو مفيش أماكنية أنك تحصل منى الفلوس ليه متزودش مكاتب التحصيل على مستوى المحافظة ؟؟؟

تالت هام : المكت ذات نفسه مكانش فيه غير كمبيوتر واحد شغال عليه عامل واحد ,.أو مياة ألخ ألخ ألهبيحصل الفلوس وكمان شغال مع الطرفين طيب على الأقل يبقى فيه كمبيوتر للسيدات وواحد للرجال أنما أبدا هو دة الروتين يا سيد مع أن الشركة المصرية للأنفصالات مش حكومية أساسا أنما الروتين لسه زى ماهو

نصيحة منى ليك أخيرة : أذا كنت ناوى تدفع فاتورة تليفون خد معاك جهاز Mp3 وأقعد أسمع أغانى وكبر الطاسة على الأخر وياريت لو كباية عصير ليمون قبل ماتنزل عشان تروق بيها دمك عشان اللى هتشوفه هناك وربنا يستر عليك وعلينا