عدى عليا كتير من الناس تسأل على الأجهزة الأورجينال أستعمال خارج وحبيت أوضح رأى فيهم.
الأجهزة دى أنتهى عمرها الأفتراضى وعدى عليها الزمن وعفى عليها ، وزى مابيقولوا أكل عليها الدهر وشرب وكمان حبس بكباية شاى فى الخمسينة. الناس فى بلاد بره بتشترى جهاز أيا كانت ماركته ديل أو أيسر ألخ ألخ وبيتهلكوه سنة أو أثنين وبعدين بيرموه فى الزبالة وبتتحط فى أماكن تسمى بأماكن حفظ الأجهزة المنتهية العمر فى الطريق لأعادة تصنيعها ، طيب أيه اللى بيحصل وألجهزة دى بتوصلنا أزاى ؟
التاجر الفهلوى المصرى بيروح بره عند اى مكان من دول ويقول لصاحب المكان : أنا شايل ، يرد عليه : وأنا عايز أخلص من القرف دة ، يقوم التاجر المصرى الأصيل يلم البضاعة (الزبالة) دى فى كونتينر وأشحن على مصر يامعلم ، ويبتدى بقى يفرز البضاعة ، شاشات أل سى دى عمرها منتهى واحدة فيها كام خربوش فى الأطار يلمعها وينضفها ويلفها بسوليفان ( أهم حاجة السوليفان) ويستنى الزبون من الناس اللى مش فاهمه ويقوله بص يا معلم دى شاشة دل أورجينال مش من الهجص اللى موجود فى السوق حاليا كله تعبان دى بقى الأصلى ، الزبون طبعا – أسف فى التعبير – يريل على نفسه ويشترى علطول.
يكمل التاجر الفرز ، كيسه طاير منها هارد تعبان 40 جيجا يحطلها هارد وينفخها ببلاور ويلمعها من بره ويرش عليها بالأكاى علشان الرطوبة وبرضة توصل لمرحلة السوليفان ، يدخل الزبون : أنا عاوز كيس أورجينال ، البائع ( أهلا وسهلا) : أنت تأمر حضرتك ، عارف أسعار الكيسات ؟؟؟ لأ قولنا : البائع يقوله : بتبدى من مش عارف ألف وكام وتنتهى بكام ، الزبون يقوله دى أستعمال خارج ، يرد التاجر : اه بس أحسن ألف مرة من الأجهزة الزبالة اللى بتتباع اليومين دول ، دى ديل يا باشا عارف يعنى أيه ديل ؟؟ وشاورله على لوجو ديل الدائرة الفضى ، الزبون يلاقيها بتلمع كدة وبربرق وبتاع يتسطل علطول ويتمزج وميقتنعش باى جهاز فى الدنيا الأ لما يبقى أوريجينال ياصاحبى ( على حد تعبيرهم ) ويخرج بعد ما أتضحك عليه بالجهاز الأورجينال التعبان اللى غالبا مش هيكمل معاه السنة.
نييجى بقى لرأى الشخصى فى الموضوع بعيدا عن المصايب والبلاوى اللى بنشوفها كل يوم من التجار الفهلوية بتوع مصرنا ، الأجهزة دى عمرها أنتهى وخلاص مبقتش صالحة للأستخدام ، فلو أفترضنا جدلا أنها بتبلى الغرض فلازم يكون سعرها كويس جدا جدا ولكن العكس هو الصحيح فتلاقى جهاز من أول ما قالوا يالا بينا كور تو ديو من أيام E4300 التعبان جدا جدا مع رام واحد جيجا دى دى أر تو ( رهيب ) وكمان هارد 40 جيجا ( ماشاء الله ) معاهم الكيس الأورجينال الرهيب ( باللوجو البربرق ) يعمله ألف ونص جندى مصرى ! يانهار أسود الجهاز دة أخره لو أتنطط ميجبش 500 جنية دة كمان مع أستعمال الرأفة. وتلاقى الزبون مبسوط والتاجر مبسوط أنه ضحك على الزبون المبسوط وأهم شئ الأنبساط.
تانى حاجة الشاشات التعبانة على الرغم من أنها أل سى دى الأ أنها تلاقيها زمن التأخير فيها 15 مللى ويمكن اكتر كمان وبالتالى هتشوف أحسن صورة شبحية روعة فى الأفلام السريعة ، بالأضافة إلى الأضاءة التعبانة بتاعتها لو محتاج تتأكد جربها على فيلم صورته غامقة شوية مش باين منها اى شئ الأ أشباح ، أما عن ألونها فحدث ولاحرج ، روح لأى فهلوى من التجار وشوف الشاشات اللى معروضة وشغالة وكلهم من نفس الموديل هتلاقى كل شاشة منهم ضاربة ألوان على مزاجها على الرغم من أنهم نفس الموديل ونفس الحجم ! كل دة وفى النهاية تلاقى الشاشة ال 17 بوصة بتتباع ب 400 جندى مجهول مصرى !!! للدرجة دى بقينا لعبة فى أيد التجار اللى بيستغلوا جهل السواد الأعظم من الناس ؟؟
دة كان رأى الشخصى فى الأجهزة الأوريجينال اللى التجار بيضحكوا عليكوا بيها ولك كامل الحرية فى الأقتناع أو عدمه ، ربنا يعافيكم ويجعله عامر.
