أبل .. قضايا .. أحتكار .. نفاق .. إلى أخر هذا الهراء

أبل والنفاق الأعظم !!

يظهر ان شركة أبل الغلبانة المسكينة المستضعفة بتشتكى اليومين دول ان أكبر لاعبيين فى سوق الهواتف زى موتورولا وسامسونج بيبلطجوا على أبل وبيستغلوا نظام تسجيل براءات الأختراع أسؤا أستغلال فى مواجهة الشركات الضعيفة والغلبانة أمثال أبل !!!!!

أيه الحكاية ؟؟
أبدا المحاميين بتوع شركة أبل المبجلة بيشتكوا للقضاة ان الشركات السابق ذكرها بتستغل القانون لمقاضاتهم !! وبالأخص موتورولا ( بعد شراء جوجل لها ) بتحاول تقوم بقضايا أحتكارية هدفها القضاء على المنافسة ضد أبل !!!!

يانهار ملون ، مين اللى بيقول كدة ؟؟؟ أبل !!! دى أسؤا شركة فى تاريخ البشرية فى مقاضاة كل الناس اللى بيحاولوا يعملوا منتجات تحسسهم أنهم قدامهم منافسيين وبتحاول دائما وأبدا أنها تمنع منتجاتهم توصل الأسواق!!

أبل بتدعى أن منافسيها بيستغلوا نظام تسجيل براءات الأختراع !

هى دى نفس أبل اللى فى الشهريين السابقيين ( راجع الأخبار ) رفعت قضايا على أتش تى سى HTC وسامسونج Samsung وموتورولا بتدعى فيها أنهم أنتهكوا براءات أختراع لها !!!

رفعت قضية على أتش تى سى بتدعى فيها أختراعهم للمالتى تاتش وعمل UV للبروسيسور أو أندرفولت !!! المالتى تاتش لمن لايعلم هو أختراع كامل من مطوريين اللينوكس وهو أختراع مفتوح المصدر تماما ومن حق أى شركة أو جهة تستخدمه ، اما ال Undervolt فهو خاصية تنكمن الهاتف من تقليل الفولتات التى تستخدمها بروسيسورات الهواتف الحديثة لتقليل أستهلاك البطارية ( جامدة الجملة دى ! ) طبعا الخاصية تستخدمها كل الشركات بطرق مختلفة وممكن تكون طريقة أتش تى سى قربت من طريقة أبل.

رفعت أبل 9 قضايا على سامسونج على منتجات مختلفة كلهم طلعوا فى الأخر Hocus Pocus زى ما أخواننا الأمريكان بيقولوا ، أبل أدعت فيهم ان سامسونج منتجاتها “بتدى أحساس” أنها منتجات أبل و ” بتحسس” المستخدمين أنها أبل وأنها شبه منتجات أبل !!! غنى عن الذكر انه بعد عدة جولات ومناوشات أنتهى الأمر بان المحكمة حكمت أن أبل بتستهبل ( كالعادة ) وان كل المنتجات مش شبه منتجاتها !! دة غير ان أبل لما قدمت القضية تعمدت تعدل شكل بعض المنتجات علشان تبان زى منتجاتاها زى التاب شالت صورة الهونى كومب وشالت صورة الأى أو أس وعدلت الحجم علشان يكونوا متطابقيين !!! طبعا محاولة فاشل من الشركة.

الحق يقال أبل كسبت جولة صغيرة وهى تقضى بان سامسونج تعدل على السوفتوير الخاص بالجاليرى لتعديل الكود قليلا فى حالة ال Swipe داخل الجاليرى. وسامسونج هتعدل الكود فى أى أبديت قادم لحل المشكلة وبكدة أبل نزلت على مافيش برضة !!

رفعت أبل ( مش بقولكم غلابة ! ) قضية برضة على موتورولا !!! بتقاضيهم أنهم أستولوا على حقوقهم فى المالتى تاتش ( تانى! ) وفى أشياء متعلقة بالتاتش ! لكن اللى أبل معملتش حسابه ان موتورولا ونكيا يعتبروا من أقدم الشركات فى الأتصالات عموما وعندهم كمية براءات أختراعات تهز الجبال ، لكن أبل بغطرستها المعتادة أختارت أنها تقاضى الكل.

حاليا أبل بتشكو من نفس الناس اللى قاضتهم فوق دول انهم بيقاضوها وبيستغلوا نظام تسجيل براءات الأختراعات !!! طيب يابنت الحلال هو أنتى عايزة تقاضى الناس وتستنيهم يسكتوا عليكى وتكسبى وخلاص ؟؟ مش كما تدين تدان ؟؟

أخطأ نيوتن حينما قال : لكل فعل رد فعل مساور له فى المقدار ومضاد له فى الأتجاة !! لأن المقدار من الشركات دى كان أكبر بكتير بسبب أنهم حرفيا هم اللى أخترعوا الأتصالات كما نعرفها فى الوقت الحالى وأبل تعتبر أكبر واحدة مستفيدة من أختراعاتهم دى طيب ليه تستفزيهم ؟؟؟ ليه تنقر عش الدبابير ؟؟؟

أنتهى الجزء الأول من المقال ، تابع الجزء التانى غدا بأذن ربنا.