شوية أنتقادات للناس اللى بتبيع موبايلات

الشعب المصرى فهلوى جدا وبياع كلام وبيحب يشتغل اللى قدامه فى جميع المجالات والشاب الفتك منهم اللى يعرف يشتغل الناس ويبيعلهم الحاجة الزوبالة على أنها مفيش منها لمجرد أنه قال كلمتين حلويين وجمال ، ودى أمثلة بسيطة للى بيحصل فى بلدنا العجيبة.

1- الناس اللى بتبيع أيفون 6 بسعر يفوق ال 4 الألأف جنية وأستعمال !! العيب مش منكم العيب من الهبل اللى بيشتروا لأن الموبايل أصلا تمنه أنلوكد فى بلدة ب 600 دولار يعنى 3600 جنية جديد أنلوكد 16 جيجا ، طبعا الأعتقاد ان الأيفون مفيش منه هو السبب الرئيسى وراء الأستغلال البشع دة ، يارب الناس تفوق من غيبوبتها شوية وتفهم ان أبل لاتساوى أفضل شئ.

2- الناس اللى تييجى تكتب على موبايل ما وهى بتبيعه عبارات خالية تماما من الصحة ، زى ” للبيع أفضل ما انتجت نوكيا هاتف 5800 مثلا ” !!! ياراجل يا طيب أفضل هاتف ؟؟؟ أرحم نفسك شوية بالأضافة إلى ان الموديل دة بالذات من أقذر الموديلات فى التاتش وفى كل شئ والحاجة الوحيدة اللى تشفع له هو سماعاته الخارجية ، ما علينا.

3- الناس اللى تكتب شعر فى الموبايل اللى بتبيعه ، زى ” الهاتف النادر جدا ” وفى الأخر تلاقيه موديل فاشل من الشركة لم يحقق مبيعات أصلا وعلشان كدة فعلا نادر بس خليهولك يا حبيبى النوادر دى من حقك أنت بس تستخدمها.

4- الناس اللى بتبي موبايل وتكتب جنيه ” كسر زيرو ” ولما تقوله عاز صورة يقولك ” الصورة مالهاش لازمة لأنه زى الجديد بالضبط! ” مع أنه أستخدام عدة شهور !!! واللى يقولك ” أنا لو حطيته فى العلبة مش هتعرف تفرقه عن الجديد!! ” طيب بالتوفيق ان شاء الله وتلاقى حد يصدقك.

5- واحد يقولك الهاتف لم يستخدم بتاتا ، بس ضمانه أنتهى !!! يعنى عايز تفهمنى أنه قعد جنب سيادتك لمدة سنة بدون أستخدام وهتبيعه ؟؟؟ أرحم نفسك شوية ، وفى الأخر تلاقيه عارضه أقل من سعر الجديد بالضمان بحوالى 200-300 جنية !!! أزاى سيادتك أذا كان موبايلك مالهوش ضمان يعنى أتركن جنبك سنة أكيد أيدك أكلتك وأستخدمته كتير فيها.

6- الناس اللى بتقول “لهواة التحف النادرة وهواة التميز والأختلاف وهواة اللى مفيش منه سحر وشعوذة الشركة ما أنتجتش غيره!!” لأ ياسيدى موبايلك تحفة عصره وزمانه فيه منه كتير ، ياريت ترحمنا من الكلام البايت القديم دة.

7- الناس اللى بتبيع سماعات موبايلات مستعملة ، وخصوصا نوعية In-Ear اللى بتستخدم Buds بتدخل جوا الأذن ، ياريت محدش يشترى منه القرف دة لأنه بيعرض نفسه لكمية مشاكل وأمراض كتير وبعدين خلاص مجاتش على العشرين جنية الفرق عن سعرها الجديد ، هتوفرها أكيد بعد كدة عن لما تشتريها أرخص وتروح تعالج ودانك وأسأل أى حد ألم الأذن بيبقى عامل أزاى.

دى الأمثلة اللى حاضرة فى ذهنى حاليا وفيه بلاوى تانية كتير ، أفتح أى منتدى لبيع أى هواتف وأتفرج على المهزلة الكونية اللى بتحصل هناك.