أنا بس نفسى افهم شئ واحد ، هل بلدنا أنعدمت من الكفاءات لدرجة تعيين أناس سنهم كلهم يتعدى سن المعاش ؟؟؟
مع كامل احترامى للدكتور محمد سالم وزير الأتصالات الجديد فى بلدنا الحبيبة ، لكن أعتقد ان سن 65 سنة كتير جدا وخصوصا على وزير الأتصالات وتكنولوجيا المعلومات !!! صح ولا انا غلطان ؟؟
الدكتور طلع فى تصريح رائع يدل على تفكير عظيم بيقول فيه : “إن هناك عوائق تشريعية وفنية, يصعب حلها قبل الانتخابات البرلمانية المقبلة, قد تحول دون إشراك المصريين في الخارج” نقلا عن سيادته
طيب ياريت الوزارة توضح لنا العوائق الفنية الرهيبة دى ، بلاش الكلام العائم دائما وأبدا ، أنا لما بسمع كلام زى دة بدون أبداء أسباب علطول بيطلع فى دماغى كلمة : حوارات ، حوارات الناس دى بتكذب
أبسط شئ أنكم تمكنوا المصريين من الأدلاء بأصواتهم فى سفاراتنا المختلفة فى الخارج مع تحديد ميعاد أقصى يوم كذا للأدلاء بالأصوات ويتم تجميع الأصوات بمعرفة السفارات فى الخارج وأرسالها لمصر
ليه التفكير الجامد القديم ؟؟ أنا أديتكم أقتراح سهل جدا عمله مع أنه فيه أقتراحات “تقنية” أفضل من كدة بكتير ولكن أعتقد أنها صعبة التنفيذ فعلا على حكومة الناس الكبيرة البركة دول ربنا يخليهم لنا.
هى الشباب ماتت فى مصر ولا أيه ؟؟ أمال أيه حكاية زيادة عدد السكان دى ؟؟؟ مش دول لما بيصلوا منتصف العشرينات أصبحوا شباب مؤهل للعمل السياسى ؟؟ ولا لازم يكون بيسلم نمر علشان يكون خبير ؟؟
يارب أرحم مصر من العقول الحجرية القديمة ، نفسى أشوف وزير عنده 30 سنة قبل ما أموت.
شكلك عاوز تموت علشان مش هتشوف وزير
حسنى مبارك : إنت بتحلم يا وديـــــــــع