السيد قرقر فتح الباب

هاى وسهلا وأزيكم يا شباب وأزى دماغكم العسل اللى زى الفل ، أأوبس سورى أنا دخلت البلوج مش الغرزة سورى يا جماعة أختلط على الأمر

النهاردة جاى أكلمكم عن السيد قرقر فتح الباب حبيب قلب كل من بيحب الحسد والقر على خلق الله بسبب وبدون سبب ، وللعلم فأن القر والحسد عنده حالة من السرور النفسى والسلام مع العالم من وجهة نظر سعادته ، والحسد عنده ده غاية وهدف أى أنه مش بيكسب من وراه حاجة هو فقط بيحسد لمجرد الحسد وليس لأى مصلحة شخصية أو حقد على اللى بيحسده أبدا ، هو بيبقى مرتاح لما يسحد

مثال : واحدة موزة أوى معدية من قدامنا يروح هوب رازعها البصة بس ويقوللى يانهار أزرق البت موزة كيك فظيعة ، وهوب فى ساعتها البت يا عينى أتكعبلت والحمدلله أنها لحقت نفسها على أخر لحظة كانت هتاكل حتة واقعة لذيذة جدا ، الواد بصيتله قاللى والله أنا محسدتهاش!!! كل دة وهو محسدهاش !!! أمال لو كان قاصد يحسدها كان حصلها أيه ؟؟؟

كلاكيت تانى مرة : قاعدين مرة فى ساحة قلعة قايتباى وطبعا الناس رادمة المنطقة وكاناو بالهبل لدرجة أنك لو تهت عن صحابك يبقى أنسى ياعمرو أو أنسى يا ” ضع أسمك من فضلك ” ، المهم قاعدين وسرحانين فى الخلق اللى رايحة واللى راجعة وبنفكر فى مصيبة اليوم اللى بعده وهى محاضرة الدكتور شلضم ، وبعدين بنبص بعيد لقينا بنت راكبة موتوسيكل !!! أيوه عادى البنات عندنا فى أسكندرية جامدين اوى ومزز أوى يوووووه مش دة موضوعنا ، البنت راكبة الموتوسيكل وجاييه ناحيتنا جرى الواد أو الأستاذ قرقر منعا لحسده قال البت دى حريفة وياعينى على البنت يا ولداه ، بووووووووم خبطت فى سلة مهملات على جنب أستحالة أى حد يخبط فيها أساسا بس هى خدت جرعة من صاحبنا يبقى هتسلم منها أزاى ، والبت أغمى عليها ومعرفوش يفوقوها الأ بعد مدة وطبعا دراعها أتخرشم خرابيش واللذى منه

تالت موقف هحكيهولكم أتقر عليا أنا شخصيا !!! كنت شارى موبايل N73 أول مانزل كان ساعتها الناس بتقوللى أيه الموبايل الغريب دة ، ييجوا يشوفوه دلوقتى بقى مع الخلق كلها وطوب الأرض أشتراه ، أياميها تصادف أن العربية بتاعت والدى كانت معايا وكمان كان معايا ال MP3 الجديد ، بس الواد القرقر شاف الكلام دة وقاللى أيوه يابا اللى عيشته أرتاحت وبوووووووم ، يادوبك خلص جملته السحرية كان الموبايل واكل أول وقعة خدها فى حياته العامرة اللى أستمرت سنتين ، تانى يوم العربية فيها حاجة غلط وبتطلع أصوات عجيبة !!! ومش بتجرى ولا بتسحب ، أيه اللى حصل ؟؟؟!! نسيتم أن الواد قر عليا ولا أيه ، رحت للميكانيكى وبعد الفحص والتمحيص أكتشفنا أن جوان Join بس بتتنطق بمط الواو جووووووووان كدة يعنى ، أكتشف أن جوان وش السلندر ضرب !!! يا نهار مش فايت دة معناه أن الموتور هيتحل وخدلك يومين عطله غير 300 جنية تكاليف تصليح ، منك لله ياللى كنت السبب الله يحرقك بجاز ، تانى يوم برضة ال MP3 مش راضى يشتغل !!! رجعته للراجل وما أشتريتهوش تانى !!! منك لله

الأمثلة كتيييييييير جدا جدا جدا ولايتسع المجال لذكرها

مداخلة هامة جدا جدا : دلوقتى حالا فى أسكندرية الدنيا بترخ مطر بالهبل على ذكر الفقرى الحسود والأستاذ قرقر !!!!! واللى مش مصدقنى دلوقتى 12 أكتوبر الساعة 5 الأ ربع صباحا ، وتعتبر أول مرة ترخ فيها الشتاء دة!!!! أنا بخمن أن ذكر السيد قرقر هو اللى خلى الدنيا تشتى ، ربنا طبعا هو الآمر بس برضة مننساش دور الأستاذ قرقر ، منك لله

ملحوظة هامة جدا جدا : الشخصيات المقدمة على صفحات المدونة أنما هى شخصيات من محض خيال كاتبا لبلوج وأى تشابه بين الشخصيات اللى على البلوج والواقع لهو من محض الصدفة البحتة ، وكاتب البلوج لايتحمل مسؤلية أى ضرر ناتج عن هذا التشابة

مينا سيندروم

السيد مينا سيندروم

هو شخصية طبيعية خالص زى أى شخص طبيعى نعرفوه أنا وأنت يأكل ويشرب ويتنفس وليه أربعة اطراف عادى خالص وبيمشى على أيديه مش على رجليه يعنى هو شخصية طبيعية جدا وعادية ، امال أيه اللى رشحه أنه يبقى معانا النهاردة فى باب شخصيات على البلوج ؟؟؟

الأجابة بسيطة جدا جدا أن السيد مينا عنده مجموعة أعراض Syndrome بتخلى أى شئ يتعلق بالتكنولوجيا يقرب منه يحصله حاجات عجيبة جدا جدا وميرضاش يشتغل وتلاقى الجهاز دة بيهيس وبيعمل حاجات غريبة بمجرد أن مينا قرب منه وأشتغل عليه

عندى أنا على سبيل المثال لما مينا بيشرف عندنا فى البيت لازم وحتما ولابد النت يفصل ، ويحلف النت برأس أجداده أنه ماهو جاى تانى أبدا الأ بمغادرة السيد مينا للمنزل أو لما ينام!!! ساعات بيبقى جاى تعبان فيقلل شوية على السرير فى أوضتى وساعتها تقريبا مفعوله بيقل وبيروح خالص والنت بيشتغل ، أول مايفوق من غيبوبته هوب النت يفصل تانى ، والموضوع دة بيحصل كل مرة بييجى هو فيها لدرجة أن باقى أصحابى عرفوا الموضوع دة وأعترفوا بيه كظاهرة حقيقة ، مرة واحد منهم بيتصل بيا وبيقوللى عندك نت ولا مينا موجود ؟؟؟؟ لأنه متأكد أن طالما مينا عندى يبقى النت فاصل !!

برضه من اعراض السيد مينا جهازه المسكين ، لما بيقعد على جهازه الجهاز بيقعد يهيسس ياعينى ويعمل حاجات غريبة مرة الهارد يتقرأ على أنه شوية وشوش بتضحك Smiling Emotions مع العلم أن الكلام دة هو اللى بيقراه البيوس Bios والجهاز ميرضاش يشتغل ، وتلاقى النت موجود ومش فاصل بس مش بيفتح أى مواقع نهائيا ولاحتى جوجل ولما تشغل أى برنامج زى Switch Sniffer مش بيقرأ الراوتر كأنه فاصل تماما وكان المفروض أن ده يبقى الطبيعى الأ أن النت مش بيفتح وعلى الرغم من ذلك بيبقى برنامج uTorrent شغال بيحمل عادى خالص وعلى 220 ك/ث كمان!!!

من الأعراض اللى بتحصل على جهاز مينا أنه مبيرضاش يعمل كوبى Copy بأى حال من الأحوال مع العلم أن جهازه مش ميت ولا بايظ بالعكس جهازه زى الفل بس هو السبب مش الجهاز ، الجهاز بيبدأ فى الكوبى عادى ويقولك الجهاز 3 Minutes Remaining أى أنه هيخلص كمان 3 دقايق والمفترض أن الرقم دة بيقل ، أنما جهاز مينا بيزيد عنده وبعدها ب 10 دقايق تلاقيه بيقولك 1236502 Minutes Remaining ويفضل يزيد لحد ما أنت تقفله وتزهق !!!

ينصح دائما بالتعامل مع أجهزتك بحرص شديد عند تواجد السيد مينا سيندروم حواليكم أو فى المنطقة ولو مرة سألك أيه أخبار النت عندك قله النت فاصل بقاله كام يوم والسويتش مش شغال والراوتر أتحرق وخط التليفون مش بيشتغل من أساسه أما عن الجهاز فهو أتحرق ومش بيبتدى أساسا والموبايل بتاعك مسقط شبكة وال MP3 بتاعك فاصل شحن والشاحن بتاعه باظ ومفيش منه ، وبكدة يبقى أنت أستبعدت كافة الأحتمالات اللى تخلى السيندروم يوصلك ولو عن طريق الكلام فقط

الشخصية دى ممكن أكتب عنها صفحات وصفحات أنما الوقت مبيسعفش أبدا ، وبعد أذنكم أنا رايح أرد على السيد مينا بيتصل أهه ويارب أفتكر أقله أن جهازى بايظ وربنا يستر

ملحوظة هامة جدا جدا : الشخصيات المقدمة على صفحات المدونة أنما هى شخصيات من محض خيال كاتبا لبلوج وأى تشابه بين الشخصيات اللى على البلوج والواقع لهو من محض الصدفة البحتة ، وكاتب البلوج لايتحمل مسؤلية أى ضرر ناتج عن هذا التشابة

أنا والبحر والهوا والزبالة

الحكاية انى كنت ماشى على البحر مع الزملاء الأعزاء والأصحاب الأوفياء والنزلاء السعداء ألخ ألخ ألخ ، وبالتحديد على شاطئ المندرة أمام محل شهير يقوم ببيع الجيلاتى ، وليه فرع تانى على البحر برضة بالقرب من القلعة وكفاية تلميحات على كدة ، أشترينا الجيلاتى وعدينا السكة وقعدنا ناكل الجيلاتى وبعد ملخصنا بدور على سلة عشان أرمى فيها العلبة بتاعت الجيلاتى الفاضية ، طبعا ملقيتش خالص ببص على الشاطئ والرمال الأقى مناظر رائعة جدا جدا ، أكوام وأكوام من العلب الفاضية والورق والأكياس والزبالة وكلها تبع السيد صاحب محل الجيلاتى وبصراحة مناظر وحشة جدا جدا جدا وتقرف وتبين أد أيه احنا شعب غير متحضر نهائى ، المهم أسيبكم مع الصور المقرفة

ملحوظة مهمة جدا : اللى عايز يشوف الصورة واضحة يدوس عليها عشان تكبر

أيه رأيكم فى المناظر الجميلة دى ؟؟؟ فيها أيه لما كلنا نرمى فى السلة ؟ وفيها أيه لما الحكومة توفر أماكن نرمى فيها ؟؟؟ ربنا يسهل ونوصل لحل للمشكلة دى

الشاب داونلود

الشاب داونلود

شخصية على دونلود أو محمد داونلود هتلاقيها كتيرة وهنقابلها كتير فى حياتنا وهو الشخص اللى بيؤمن أن الحياة بدون داونلود متستاهلش أن احنا نعيش فيها ولازم نتخذ قرار بشأنها أما الأنتحار أو الداونلود

الشخص دة غالبا بيتسم بأنه يا أما ذكى جدا وعنده حتة هطل كدة على خفيف يا أما غبى موت وتشوف منظره تموت من الضحك ، وهو أكيد عنده جهاز أمال بيدون أزاى وتلاقى عنده خط النت سريع مش أقل من ميجابت فى الثانية وتلاقى عنده برامج دانلود كتير تبدأ بالتورنتات زى برنامج uTorrent وتنتهى ببرامج التحميل السريع زى برنامج Mass Downloader كدة

وتلاقيه كمان حافظ أن موقع كذا نزل برنامج كذا وموقع كذا نزل فيلم كذا النهاردة ، أو تلاقيه عارف أن الموسم التالت من مسلسل كذا هينزل نسخة DVDRip فى يوم كذا مع العلم أن النسخة ال HDTV نزلت يوم كذا ، بمعنى ان مشغول طول النهار بالداونلود وهيعمل ايه بالتحميل وتسأله : أيه يابنى هتعمل أيه بكرة ؟؟؟ يقولك هحمل سيزون كذا من مسلسل كذا بالأضافة إلى فيلم كذا وكذا ، تقوله يابنى أقصد هتعمل أيه فى دنيتك هتهبب أيه ولا هتقعد فى البيت ، يبصلك بغباء بدون فهم ويقولك ماهو أنا قلتلك هحمل كذا وكذا الله هو أنت مبتسمعش ولا أيه ؟؟؟

مع العلم أن هو اللى مغيب ومايعرفش أى حاجة فى دنياه الأ الداونلود ، هتعمل أيه يابنى بكرة ؟ دانلود ، طيب هتعمل أيه بالليل ؟ داونلود ، طيب عملت أيه أمبارح ؟ داونلود ، هتفطر أيه بكرة ؟ دانلود ، مبرمج على أنه يدون أى حاجة فى أى وقت حتى لو مش هتنفعه بعد كدة المهم يدون وخلاص!!!!

البنى أدم دة بيبقى طيب غالبا ومعظم الأحوال غير مؤذى ومش شرانى خالص ، ولكن أتق شر الحليم أذا غضب ، وحالات الغضب بتاعته بيرجع بدايتها لعدة أسباب منها أن النت فاصل ومش عارف يحمل وهو متضايق لأن النت فاصل ، او أن الهارد مليان عنده ومش لاقى مكان يحمل فيه ، أو النكبة الكبيرة بقى لما يكون مش لاقى حاجة يحملها بتلاقيه متضايق لأن جهازه مش شغال بيحمل وهو غالبا بيبقى قلقان وعنده حيرة كبيرة لأنه مش عارف يحمل أيه وتلاقى برنامج حياته واقف ومتكعبل , لأنه بيبقى غالبا واخد على النوم على صوت جهازه اللى شغال طول الليل بيحمل

نصيحة هامة : لما تيجى تتعامل مع أى شخصية من دول أتعامل معاه بحرص وشوف الأول مزاجه التحميلى كويس ولا لأ لأنه لو كان مش كويس هيقرفك فى عيشتك خالص ومش هتعرف تتعامل معاه نهائيا

كنا مع شخصية السيد دانلود وكل شخصية وأنتم بخير

ملحوظة هامة جدا جدا : الشخصيات المقدمة على صفحات المدونة أنما هى شخصيات من محض خيال كاتب البلوج وأى تشابه بين الشخصيات اللى على البلوج والواقع لهو من محض الصدفة البحتة ، وكاتب البلوج لايتحمل مسؤلية أى ضرر ناتج عن هذا التشابة