كسر حماية السمبيان

تعديل مهم جدا جدا : الطريقة دى مش هتنفع مع التحديث الأخير للموبايلات اللى شايل رقم 30 لأن نوكيا عرفته وقفلت الثغرة اللى بيستخدمها الهاك دة ، أنصح أى واحد أنه يبعد عن الأبديت دة لأن فعلا مش حاسس بفرق معاه الأ عشان نوكيا تبطل كسر الحماية فقط

طبعا كلنا عارفيين أن السمبييان هو النظام اللى بيشغل معظم موبايلات النوكيا وهو بييجى بأنواع مختلفة منها S40 ودة النوعالعادى الأول زى مثلا 3110 كلاسيك أو ما شابه , وبييجى من نوع تانى وهو S60 اللى هو للموبايلات الكبيرة زى ال 6630 و فئات ال Nseries وكمان فئات ال Eseries وبييجى منه انواع كتيرة من النظام التانى دة مفيش مجال هنا لشرحها ( على فكرة فى نوع تالت هنتكلم عنه فى موضوع تانى) أن شاءء الله

المشكلة فى النوع التانى دة أن كل البرامج بتاعته لازم ييجى معاها شهادة Certificate موقعة من شركة سمبيان Symbian نفسها وهى دى بقى المشكلة لأن الشهادات مدتها سنة واحدة وكمان فيه برامج مش موقعه Unsigned وفيه برامج أنتهت صلاحيتها Expired Certificate ألخ ألخ من رسائل الأخطاء اللى بتقرف الواحد وبتخليه عايز يكسر الموبايل

المشكلة دى أتحلت لما أخترعوا موضوع الهاك Hacking للسوفتوير بتاع موبايلك بتخلى السيستم يفتح الملفات بتاعته ويقبل أى برنامج وكانت عمليات مملة وغلسة ومش سهل اى حد يعملها بس بصراحة كانت تستاهل القرف اللى كنت بشوفه معاها

دلوقتى العملية ببقت سهلة جدا جدا جدا بعد كتير من الهاكات والتعديلات على النظام بقى فيه عمليه مفيش أسهل منها وكمان مش محتاجة كمبيوتر!!! أيوة متستغربوش طالما الملف موجود على الموبايل خلاص أنتهت والنهاردة أنا هشرحلكم طريقة عمل الهاك لأى نوع موبايل من السمبيان S60 بس الأنواع الجديدة S60v3 لأن الأنواع القديمة مالهاش هاك أو بمعنى أصح مش محتاجة لأن كل برامجها موجودة ومكركة , المهم أن أنا هشرحلكم على الموبايلات الجديدة اللى بتستعمل نظام Symbian 9.1/9.2 فقط

الموضوع سهل جدا ومش محتاج خبير فى الموبايلات وأنا هشرحه خطوة بخطوة وبالصور كمان

الأول : حمل الملفات دى

Devices.List

Drakkarious2.01.3250.5500.E50.E51.E61

Drakkarious2.01.FP1.and.PreFP1

تانى حاجة أبعت الملف المناسب لموبايلك سواء بالكابل أو بالبلوتوث

لو كان موبايلك 3250 – 5500 – E50 – E51 – E61

يبقى هتبعت الملف اللى أسمه Drakkarious2.01.3250.5500.E50.E51.E61 لموبايلك

لو كان موبايلك أى نوع تانى من اللى موجود فى Devices.List.txt يبقى هتبعت الملف التانى

اللى هو أسمه Drakkarious2.01.FP1.and.PreFP1.SiS

بعد كدة هتغير تاريخ الموبايل : متنساش الحتة دى , لازم تغيره ل 15/5/2007 والأ البرنامج مش هيتسطب أساسا معاك وتبقى العملية فشلت قبل ما تبدأ.

تغيير التاريخ خطوة مهمة جدا

المهمة الجاية هى فتح ال File Manager والوصول للمكان اللى فيه الملف اللى حطيته قبل كدة على الموبايل وبدأ التسطيب

أختار الملف وسطبه

خلال التسطيب هتظهرلك الرسالة دى ولازم تختار منها نوع موبايلك بس يعنى تشيل علامة الصح من على النوع التانى , طبعا هتسألنى هعرف موبايلى FP1 أو PREFP1 أزاى ؟ هقولك أفتح ملف Devices.List.txt اللى حملته قبل كدة وهتلاقى مكتوب الموبايلات ونوعها

FP1 أو PREFP1 أختار حسب موبايلك

بعد ما التسطيب يخلص على خير أن شاء الله هتلاقى شوية برامج جديدة أتحطت فى قايمة Applications وهم

CapsOn

CapsOff

HelloCarbide

X-plore

دلوقتى هنفتح برنامج X-Plore وبعدين ندوس على 0 (الزيرو) أو ( الصفر) عشان نفتح أعدادات البرنامج , هتعلم على أول أربع مربعات اللى هما Show Hidden Files و Show ROM Drives و Show RAM Drives و Show System Files/Folders وبعدين هتدوس Back عشان نكمل

X-Plore ضبط برنامج

بدون ماتضبط برنامج X-Plore سيبه مفتوح أوعى تقفله , دوس على زرار القايمة وأختار برنامج HelloCarbide وبعد ماتفتحه أختار من قائمة Options الأختيار Menu1 وهتلاقى الموبايل يا أما خرف شوية وقعد يجيب رسايل خطأ كتير كدة المهم تسيبه متخفش للأخر , يا أما هيخلص علطول ودة حسب نوع الموبايل وعموما فى الحالتين هتدوس Yes فى النهاية

Menu1 أختر

Yes أختر

أفتح برنامج X-Plore تانى وأدخل على ال C:\ هتلاقى فى الأخر ملف أسمه Hack.rar أفتحه هتلاقى ملفين أسمهم installserver.exe وملف CProfDriver_SISX.ldd علم عليهم الأتنين

فى السى Hack.rar هتلاقى ملف

أختار من قائمة Menu الأختيار الأول File وبعدين Extract to من القايمة وبعدين تفك الضغط فى C:\System\Bin ولو سألك أن الملفات دى موجودة أعملها Overwrite وبكدة يبقى تمام

Extract to علم على الملفين وأختر

أخر خطوة هى أنك تعمل ريستارت للجهاز فى ساعتها متلعبش فى أى حاجة تانى أعمل ريستارت علطول وألف مبروك عليك بعد ما الجهاز يفتح سطب اللى أنت عايزة حتى لو البرنامج بايظ كمان وأكسبيرد ومش موقع وأى شئ فى أى شئ

إلى اللقاء فى المرة الجاية أن شاء الله

الجواز نظام أجتماعى رائع ولكن

بلييز يا جماعة محدش يفهمنى غلط أنا مش ضد الجواز فى حاجة بالعكس أنا بشجع الجواز تماما لأن من غيره أحنا مش هنستمر والحياة هتبقى أصعب وأصعب وقلة الجواز هتؤدى إلى مشاكل أكبر ولكن ( آآآه من لكن) أنا بتكلم عن الجواز دلوقتى من نظر الأمكانيات وهسألك أنت كشاب سؤال

هل عمرك فكرت الجواز هيترتب عليه أيه ؟؟؟؟

سؤال صعب مش كدة ؟ تعالى نفكر مع بعض ، مبدئيا كدة الجواز محتاج عش زوجية بالعقل
كدة صح ؟؟؟ طيب أنا هفترض أن الحد الأدنى لمساحة الشقة اللى ممكن تتجوز فيها هيبقى
70 متر على سبيل المثال واللى هى بتختلف من ثقافة ومستوى للتانى ولكن خلينا نقول
الحد الأدنى زى ماقلت هيبقى 70 متر ( مربع طبعا مش مكعب ) وأنا قريت فى الوسيط أن
المتر مثلا فى ميدان الساعة فى فيكتوريا ( أسكندرية ) كان عامل فى حدود الباكو
بمعنى أنك عشان تجيب عش زوجية عايزلك 70,000 جنية مصرى

طيب هو انت هتقعد على الطوب فى العش دة مش محتاج توضب الشقة ؟؟ أوكاى وضب ياسيدى
وهوب تلاقى كمان 10 طاروا على الأقل , طيب أيه أخبار الفرش ؟؟؟ أنت عليك كله
والعروسة عليها السفرة والمطبخ ، يا حلاوة العروسة بتاخد دايما أسهل حاجة ، مش مهم
كل يهون فى سبيل عروس المستقبل الباهر بعون الله ، طيب ياحلو يبقى انت محتاج 20 كدة
عشان تفرش ولو أفترضنا هتشوفلك أوضة نص عمر وأوضة جديدة وصالون وأنترية يبقى أنت
عايزلك 15 وأحنا دايما بنفرض الأقل خلينا فى 15 أوكاى ؟ تمام

الله أنت نسيت الأجهزة ولا أيه ؟؟؟؟ طيب هتعيش أزاى ؟؟؟ لازم على الأقل تلاجة ( أل
يعنى الأكل بالهبل وبيتحط فى التلاجة ) وكمان بوتجاز ( نفسى أعرف الكلمة اللطيفة دى
جات منين ؟) وتليفزيون ( لزوم السهرة) وكمان مروحتين ( لزوم التهوية ، ولا نتخنق
يعنى ؟) وطبعا غسالة ( أومال نسيب الهدوم تعفن ) وهكذا دواليك فى باقى الأجهزة
اللازمة

كل دة كويس بس كدة أنت مفرتش الشقة !!! أومال كل دة كان أيه ؟؟؟ لأ دة مجرد تمهيد ،
لسه الستاير ولسه السجاد ولسه النجف والرفايع دى اللى بتتكلف من 5 إلى 10 بواكى فقط
ويبقى الوضع على ماهو عليه وعلى المتضرر اللجوء إلى القضاء

كدة ياحلو يبقى أنت عايزلك على الأقل 100 ألف جنية لزوم الجواز ، ولو أنت من سعداء
الحظ وعندك شقة أساسا يبقى أنت برضة لسه محتاج 40 ألف جنية عشان التوضيب وكل ماشقتك
كبرت أدفع يا معلم

بس ياسيدى هى دى كل تكاليف الجواز العملية مش صعبة زى ما أنت شايف محتاجة بس أنك
تكون بتشتغل بشغلانة بتدخلك وفر فى الشهر بعد مصاريفك 2000 جنية يبقى أنت هتتجوز
مرتاح بعد ماتحوش 5 سنين بس وساعتها بقى هترجع تلاقى الشقة اللى ب 70 بقت ب 100
وتبتدى تحوش تانى وكان الله فى عونك

سؤالى ليك دلوقتى : فكرت تتجوز قبل كدة ؟؟؟

خوازيق القدر

خوازيق القدر

أولا أحب أقول أنا متأسف للجميع على أستخدام كلمة خوازيق دى ، بس للأسف ملقيتش فى الوجدان الجمعى للبشر كلهم أى كلمة تعبر عن الموضوع الأ كلمة خوازيق فعلا ، يعنى حاول تفهمنى أنت أزاى تعبر عن الخازوق الأ بأنه خازوق ؟؟؟؟!! فهمتوا الأسباب ؟ كويس نخش فى الموضوع بقى

تعريف خوازيق القدر

تقدر تقول أن خوازيق القدر هى البلاوى اللى بتتحدف عليك وأنت موجود فى الشارع أو فى بيتكم أو أى مكان أنت موجود فيه المهم أنك قاعد مش حاسس بحاجة ولا دريان وبوووم تلاقى خازوق مستنيك.

مثال عن الخازوق

أنت قاعد فى البيت لابيك ولا عليك وقاعد قعدة مسالمة خالص ومش فى الدماغ وضاربها طناش للدنيا أيام الأمتحانات بتاعت الكلية بتاعت سيادتك ، وفجأة يجيلك حد من البيت يقولك : كلم تليفون ، هوب تعمل فيها أنت عنتر أبو شداد وتجرى على التليفون فاكر أنك هتكلم كونداليزا رايس مثلا ، وطبعا تصاب بخيبة أمل كبرى لما تلاقيه واحد صاحبك ، بس برضة هتنبسط أكتر لما تعرف أنع هيقولك على خازوق رائع : شفت يابنى طلع علينا 12 فصل مش 8 فصول من الكتاب !!!! طبعا هتصاب بالهلع ( أفضل لفظ يعبر عنها Panic ) وتفضل تقول أزاى وبتاع ، واللى صاحبك ميعرفهوش أنه بالكلام دة أذاك أكتر من مانفعك !!! طيب ليه ؟ لأن حضرتك أساسا كنت مطمن أنك هتذاكر 8 فصول فقط من أصل 15 زى ما الدكتور الباشا قال ، فقولت أنك هتذاكر 6 من أصل ال 8 اللى هما المفروض عليك بمعنى أنك مطنش أتنين فصل بس ، فييجى صاحبك يقولك علينا 12 فصل يبقى أنتى ياحلو ذاكرت نص المنهج بس وطبقا لمبدأ خوازيق القدر يبقى أكتر من نص الأمتحان هيييجى من النص اللى أنت مش مذاكرة أساسا !!! وكل مادة وأنت طيب!!!!

أنواع الخوازيق

وفى الجزء دة أطالب بتعديل البيت القائل : المصائب لا تأتى فرادى ؛ إلى : الخوازيق لاتأتى فرادى ، طيب ليه
؟ لأن الخوازيق نوعين ، نوع عادى ونوع مركب , النوع العادى زى المثال اللى فوق كدة تبقى قاعد كدة براحتك وهوب تاكل خازوق منفرد أو عادى والموضوع دة بيحصل كتير ، وفيه النوع التانى اللى هو الخازوق المركب اللى هو عبارة عن سلسلة خوازيق متلاحقة لايفصل بينها الأ زمن قصير قد يتراوح مابين عدة دقائق إلى عده ساعات

الخازوق المركب

زى ماشرحت الفقرة اللى فاتت أنه فيه خازوق مركب وعادى ودلوقتى هنشوف الخزوق المركب يعنى أيه ، أنا قاعد فى أمانة الله من أسبوعين وهوب جدى تعبان ولازم يروح المستشفى ، حاضر يا جماعة هنوديه الصبح أوكاى حاضر وبتاع جدى تعب جامد بالليل فتفضل الوالد مشكورا وقام بتوصيله لكن ( وآه من لكن دى) قاللى هتروح الصبح تودى أختك الأمتحان ، أوكاى حاضر أنا موافق وهنا بقى تتبتدى سلسلة الخوازيق ، العربية مش عايزة تدور !!! أهلا وسهلا لو أختى عرفت هيبقى يوم منيل المهم سايست العربية لحد مادارت كويس الحمدلله تمام رحنا على الأمتحان وأول ماوصلت على باب الكلية وبركن بووووووووم ده تانى خازوق : خبطت العربية !!! وأبتسمت فى سرى لأنى أول مرة أخبط العربية من يوم ما أتعلمت السواقة يعنى بقالى حوالى 7 سنين نضيف بدون مشاكل مش مشكلة المهم أنى راضيت الراجل وروحت على البيت هوب الجهاز مش راضى يشتغل الويندوز باشا واقع مش مشكلة طالما سلسلة الخوازيق أبتدت يبقى أسهل حاجة أنك تسلم لها ، نمت شوية وقمت من النوم هوب على الكلية عشان أعرف النتيجة ، هاه يابنى عملت أيه ؟؟؟؟؟ طلعت شايل السنة وهو دة بقى أعزائى المشاهدين الخازوق الرابع فى سلسة الخوازيق الجامدة دى , عادى ربنا يسهل الحمدلله على كل شئ تتعوض السنة الجاية رحت على المحل وأستكمالا لدائرة النحس والخوازيق كسرت نظارة عميل ودة طبعا كان معناه أنى أصلحهاله على حسابى مش مشكلة يبقى كدة خمسة ، طلعت أشتغل فى الشغل الباقى كسرت عدسة نظارة لزبون أخر ( أنا شغال فى محل نظارات لو مخدتوش بالكم ) وطبعا دة معناه معروف أنى هعمله عدسة تانية ، كل دة وأنا ساكت على سلسلة الأحداث الرائعة دى بس العدسة الأخيرة دى فوقتنى فقولت أنا لازم أقعد فى حالة السبات أو البيات الشتوى أو Hibernation عشان ميحصلش أى حاجة تانى وفعلا عدى اليوم على خير لحد ماروحت البيت عشان أكمل عواقب الخازوق التالت ( فاكرينه بتاع الويندوز) من تحميل ويندوز وتسطيب برامج وعمل تحديثات ألخ ألخ ألخ وهى عملية مملة لأقصى درجة وخصوصا لو بتستعمل برامج بالهبل زى أنا كدة

عموما فى النهاية أحب أقولك أن أسلم طريقة للتعامل مع الخوازيق هى أولا سماع الخازوق وبعدين كباية مية كويسة بعدين تتقبل الخازوق بصدر رحب بحيث مينتجش عنه حرق لأعصابك وتبتدى تتعالج كمان من الأعصاب وبكدة يبقى أنت كملت بنفسك دائرة الخوازيق

عموما : لن تنجو من خوازيق القدر

والسؤال بقى هنا : قابلك خازوق النهاردة ؟؟؟؟

الكارما

الكارما

- الكارما : هى مبدأ نشأ فى الأصل عن تعاليم بوذا اللى بيطبقها متبعى الديانة البوذية , ودة مش معنها أنه كفر أو ألحاد أبدا , فكر  فيها على أنها مجرد صورة عن شئ مهم ممكن يصلح فينا الكتير فى حياتنا.

- الكارما بتتكلم عن وجود كيان معين بيحاسبك على الكويس والسئ اللى أنت بتعمله فى حياتك فمثلا لو أنت عملت حاجة كويسة وساعدت حد هتترد ليك الحاجة الكويسة دى بحاجة كويسة زيها ونفس الكلام بينطبق على الفعل الغلط اللى لو عملته برضة هيتردلك بشئ غلط مش هيعجبك.

- لو أخدنا كلنا بعين الأعتبار الكارما كل واحد هيبقى بيعمل الحاجة وهو حاسس أنه بيعملها لنفسة , يعنى أنا ساعدت واحد عجوز يعدى الشارع روحت البيت لقيت واحد صاحبى بيتصل بيا بيقوللى خبر حلو جدا , الكارما ردت عليا ونفعتنى برضة الكلام دة هينطبق عليا لو رحت البيت ورزعت خناقة معاهم فى البيت وفجأة بوووووووووم حصلتلى حاجة تطلع من نافوخى ( أو يافوخى للدقة اللغوية) لأن الكارما مبتنساش.

- مش معنى كدة أن الكارما Strikes Back Quick أو بترد بسرعة بالعكس أنت ممكن تعمل ألف حاجة كويسة ويتجمعولك مرة واحدة فى شئ مهم جدا أنت كان نفسك يحصلك من زمان وممكن تعمل حاجة وحشة لواحد وتترد لك بعد كدة كمان شهر ولا أتنين.

- تخيل كدة معايا أنك فى مجتمع ماشى بمبدأ الكارما دة , مش دة هيبقى المجتمع المثالى اللى كان بيحلم بيه سير توماس مور سنة 1516 لما كتب رواية Utopia اللى بتوصف مجتمع مثالى نشأ فى جزيرة فى المحيط الأطلنطى وفيه نظام الحكم مثالى وكل شئ مثالى والناس بتعامل فيه بعض كويس , مش كد يبقى أحنا قربنا من الجنة اللى ربنا بيحضرها للبنى أدم الكويس ؟؟؟ فليه منحاولش نعيش فيها قبل ما الكويس فينا يطلع الجنة الربانية ؟؟؟

- أنا عن نفسى بؤمن بمبدأ الكارما كويس جدا وبحاول أطبقه على قد مقدر فى حدود قدراتى البشرية مع العلم أنى شاب بحب أتريق وأعلق على أى شئ ماشى شايفاه عنيا ومعرفش ليه ربنا خالقنى كدة , بس أنا مبحبش أسيب حجر على التانى الأ وأقلبه , بمعنى أنى صعب أطبق المبدأ دة بس بحاول على قد مقدر أعمل كدة , وأنا مبقولش أن أى حد لازم يطبقه حرفيا , أحنا بشر والبشر قدراتهم محدودة وليهم حدود.

- نفسى كل واحد يقعد يحاسب نفسه يشوف دفتر الكارما متسجله فيه أيه النهاردة أنت عملت أيه كويس وأيه وحش ؟ أنت دفعت ديونك وصلحت الوحش اللى كان هيتردلك ولا لأ ؟؟

والسؤال فى الأخر هنا : هل أنت مؤمن بالكارما ؟ فكر شوية مع نفسك